Թբիլիսին Փարաջանովի շնչով
Կայացել է Փարաջանովին նվիրված ավանդական մրցանակաբաշխություն․
Թբիլիսիի Քաղաքային խորհրդի սրահում կայացել է մեծանուն կինոռեժիսոր Սերգեյ Փարաջանովին նվիրված ստեղծագործական մրցույթի ավանդական մրցանակաբաշխությունը։
«Արմենպրես»-ի հաղորդմամբ՝ միջոցառմանը ողջույնի խոսքով հանդես են եկել Թբիլիսիի սակրեբուլոյի նախագահ Զուրաբ Աբաշիձեն և Վրաստանում ՀՀ դեսպան Աշոտ Սմբատյանը։
«Իր խոսքում ՀՀ դեսպանը կարևորել է մեծ արվեստագետի համաշխարհային մշակութային ժառանգությունը, որը կոչված է գեղագիտության լեզվով ժողովուրդներին և մասնավորապես` հայ ու վրաց ժողովուրդներին միմյանց կապելու բարի գործին»։
ՀՀ դեսպանը շնորհակալություն է հայտնել Թբիլիսիի սակրեբուլոյի ղեկավարությանը` ամենամյա միջոցառումը հյուրընկալելու համար, ինչպես նաև մյուս կազմակերպիչներին` Վիրահայերի միություն հասարակական կազմակերպությանը և վերջինիս ղեկավար Մարի Առաքելովային։