Կահիրեի մերձակայքում նոյեմբերի 1-ին  կբացվի Մեծ եգիպտական թանգարանը: 1 միլիարդ դոլար արժողությամբ հսկայական համալիրը նվիրված է մեկ քաղաքակրթության պատմությանը։ Թանգարանը գտնվում է Գիզայի բուրգերից մեկ կիլոմետր հեռավորության վրա և զբաղեցնում է 470 հազար քառակուսի մետր տարածք։
Այս նախագծի մասին Եգիպտոսի կառավարությունը հայտարարել էր դեռևս 1992 թվականին, բայց շինարարությունը սկսվել է միայն 2005-ին։ 

Բացման արարողությանը ներկա կլինեն աշխարհի առաջնորդներ և Եգիպտոսի նախագահ Աբդել Ֆաթթահ ալ-Սիսին։ Բուրգերից թանգարան է տանում նոր հետիոտնային ճանապարհ։

Աֆրիկայի երկրորդ խոշորագույն տնտեսությունն ունեցող Եգիպտոսը սպասում է, որ թանգարանը կշարունակի զարգացնել զբոսաշրջությունը։ 2024-ին երկիրը ընդունել է ռեկորդային 15.7 միլիոն այցելու, իսկ կառավարությունը նպատակ ունի 2032 թվականին այդ թիվը կրկնապատկել։ Թանգարանի ադմինիստրատորները ակնկալում են օրական 15-20 հազար այցելու։